Vitrine

Dizionari ortografic Furlan. Plui di 38.000 lemis dal talian al furlan e dal furlan al talian. Grafie uficiâl e lenghe furlane di riferiment. Comprilu ca di noaltris!

Cors di grafie furlane. Une formulazion clare e sintetiche des regulis di grafie uficiâl de lenghe furlane, cun esercizis e soluzions e un cd par i detâts. Par cui che al à za une buine paronance de lenghe furlane fevelade , ma che al vûl imparâ a scrivi cun plui sigurece. Comprilu ca di noaltris!

Claminus

Serling soc.coop.
email: info@serling.org
telefon / fax : +39 0432 649131
p.IVZ (IVA) 02203350307

Gnovis

Presentazion di "Jude"
18/11/2009 - Presentazion dal program "Jude" tradutôr automatic dal talian al furlan, martars al 1 di Dicembar dal 2009 aes 18.00 li de Fondazion CRUP in v. Manin 15 a Udin,. Par altris informazions lei il comunicât stampe.

Cors di grafie furlane
04/05/2009 - Sabide ai 16 di Mai, aes 18.00 li de Libreria Friuli in vie dei Rizzani 1/3 a Udin, si presentarà il libri "Cors di grafie Furlane" curât di Sandri Carrozzo. Par altris informazions lei il comunicât stampe.

Inzornament dal sît
29/04/2009 - La sezion leams dal sît e je stade inzornade cun gnovis informazions.

Cors a Felet
20/04/2009 - Par resons tecnichis il cors “Cemût si scrivial?”, al è stât rimandât ae Sierade dal 2009.

Materiâi

Une piçule rassegne di materiâi publicâts di socis de Serling:

Articui - su scuele, politiche linguistiche, tradutologjie e v.i.
Publicazions - studi e ricercje
Traduzions - libris voltâts dai socis

Sandri Carrozzo, Linda Picco
Efiets economics e ocupazionâi des leçs di tutele de lenghe furlane
CUF (2009).

Cheste ricercje e vûl capî i efiets economics e ocupazionâi des leçs di tutele de lenghe furlane, te prospetive che i fonts destinâts ae politiche linguistiche no dome a rivin a di un risultât tecnic, ma ancje che a rindin in tiermins economics e sociâi, fasint deventâ chest sfuarç economic coletîf no un pês, ma ben un invistiment e une risorse ancje economiche. Di chê altre bande e je la cussience che ancje risultâts tecnics determinants a podaran vignî dome cu la cressite professionâl dai operadôrs linguistics, che e pues lâ indevant dome intune clime di stabilitât ocupazionâl. Dai risultâts di cheste ricercje i legjislatôrs e i aministradôrs a podaran gjavâ informazions che ju podaran indreçâ tes lôr sieltis. Ricercje fate daûr de Convenzion n. 092/1AG dai 08.08.2006 cu la Regjon Autonome Friûl V.J.

discjame Efiets economics e ocupazionâi ... in formât *.pdf
discjame Serling 2001 - 2006 in formât *.pdf

Sandri Carrozzo
Gramatiche Fonetiche Furlane
CFL2000 (2008).

Un repertori resonât dai fenomens fonetics che si cjatin tal complès dal sisteme linguistic furlan, par orientâsi tra varietâts e lenghe standard. Passe 130 pagjinis che a derivin dal lavôr puartât indevant tai ultins agns te normazion de lenghe furlane.

Stefania Garlatti Costa, Roberta Melchior
Lenghe. Cors di Furlan
CUF (2008).

"Lenghe. Cors di Furlan" al è un gnûf cors di furlan par students di etât adulte. Il cors al è pensât par podê jessi doprât di students cun abilitâts diferentis: di chei che a capissin ben il furlan, ma no lu fevelin, a chei che lu cjacarin tant che marilenghe, ma no son bogns di lei e scrivi par furlan. Il cors al fronte une varietât di tematichis e situazions, cjapant ancje in considerazion i lengaçs specialistics dal gjornalisim, de aministrazion, de medisine e de sience. Il cors al cjape dentri: 14 unitâts progressivis, une presentazion sistematiche de grafie cun esercizis, une sezion gramaticâl cun esercizis, un glossari furlan-talian. Il cors al presente materiâl par 60-80 oris di insegnament in classe.

Carli Pup:
Memoriis platadis. Olmis di storie te narative popolâr furlane
Il Tomât, Buie (2007).

Mîts, liendis, flabis e contis si ju cjate in ducj i popui e i furlans no son dal sigûr une ecezion. La plui part di chest patrimoni al è stât tramandât par vie orâl, passant di bocje in bocje di une gjenerazion a chê altre. La narative popolâr e je duncje il risultât di interazion tra inovazion e conservazion. Si trate di un mont viert in stât sei di cjapâ che di dâ. Dispès il materiâl orâl tirât sù de vôs dal popul al è deventât fintremai element di rinassince nazionâl , in mût particolâr framieç di chei popui che no vevin ancjemò une organizazion politiche e aministrative lôr.

Sandri Carrozzo:
Il sium, il viaç, la bataie. Il miluç de magne
istitût Tellini, Manzan (2005).

Te tradizion popolâr a puedin sorevivi une vore a dilunc crodincis che a son nassudis in altris etis, cuant che popui e culturis a jerin diferents di cumò. La profonditât dai secui sierade tes contis de int e reste pal solit platade: i sempliçs no suspietin nancje che ce che vuê ur somee tant piçul al puedi sei stât impuartant, i studiâts, che aromai, di gracie no olsin plui dispreseâ lis flabis, di râr a rivin a movisi tal inzirli dai gredeis ingrumâts dal timp.

Anna Agostini, Elena Altran, Carlo Cecchini, Matteo Fogale:
Une introduzion ae probablilitât intes scuelis elementârs
Forum, Udin (2004).

Chest volum al propon i materiâi comentâts di une sperimentazion dal insegnament dai prins elements di probabilitât inte scuele elementâr. La sperimentazion e je stade puartade indenant doprant il bilinguisim e par chest e pues jessi interessant no dome pai insegnants des scuelis elementârs in gjenerâl, ma ancje par cui che al opare in realtâts bilengâls.

Matteo Fogale, Emanuele Paolini:
Une introduzion ae analisi matematiche
ILF, Codroip (2001).

Il libri al ilustre in mût sintetic i risultâts fondamentâi di un prin cors di analisi matematiche. I argoments frontâts a son: spazis metrics e topologjics, sucessions sore spazis metrics, continuitât e limits di funzions, derivadis, studi di funzions reâls, teorie de integrazion, teorie des seriis numerichis.

Licio De Clara:
Contribuzion par une bibliografie (1945-1997)
Forum, Udin (2001).

Plui di mieç secul di publicazions, 1460 titui, plui di 400 scritôrs: la lenghe furlane e mostre, in cheste bibliografie dal 1945 al 1997, la sô presince di lenghe di popul e di une identitât che e je daûr a cirî gnovis stradis par pandisi.

Linda Picco:
Ricercje su la condizion sociolenghistiche dal furlan
Forum, Udin (2001).

Cun cheste indagjin sociolinguistiche si è cirût di valutâ la situazion de lenghe furlane e di analizâ lis dinamichis relativis al ûs, aes opinions e ai judizis che i furlans a àn de lôr lenghe.

Agnul Pittana, Gotart Mitri, Licio De Clara:
La nomencladure des matematichis
ILF, Codroip (1997).

La prime propueste terminologjiche in Friûl par un argoment cussì specific, cun ducj i tiermins matematics dividûts in categoriis cu lis peraulis in jentrade par furlan, italian e inglês.